Urfan, adlis n Mohamed Oudmine

Tazwart

Lligh yelul Azetta amazigh i tanamurt g usggas 2002, yega seg iwtasen nes ad yessali idels amazigh yuwec as azal d akswat, mkan as yega usirem n imghnasen n Azetta ad tili tirra yeggudin s tutlayt tamazight acku ferken is ed asnflul ad yakkan tudert i kaygat tutlayt.

Ukan tirra s tmazight tega yuwen unazar axatar, bac ad tmel tutlayt ad is tega awd nettat tutlayt n taskla d tazuri, s manaya, ddemen imaraten imazighen ar taran s tmazight, alligh ar nettafa idlisen, ighmisen d tisghunin n tmazight gh ikiusken (kiosque) n tmurt negh.

Yessen Azetta amazigh i tanamurt is tega tirra ij n ubrid yettawin gher tilelli d ussderf n kaygat aghref, nettat ad yessawaden iswingimen d tidmi s idgharen niden n umadal. G ubrid ad nit ag yedda Azetta amazigh i tanamurt llig yera ad yessefegh tadla n umarg n umdyaz mohamed Oudmine, mi yaga assagh "URFAN".

URFAN, yega asurif amzwaru g ugharas n tirra ghur Azetta, yeg amud d tifsa imenza g iger n idels amazigh, nessarem ad fsun kigan, bac ad sul ur yeg iger n tamazight isiki ur yesmghayen tirra.

Ar yetmattay umdyaz Mohamed Oudmine, g tadla n tmdyazin nes, seg yuwen gher wayad, blan nsyafa s umatay an, tega tmdyazt nes am yan wasif yeteddun imik s imik, taf ad yessew fad n igensiwen n iman yemerrten, Rad en yaf yeghran timdyazin n tadla n URFAN ict n tamimt n tutlayt yesti umdyaz. G tizwuri, ar agh yekkat usmrgha n wassaghen n tmdyazin n tawckint n URFAN.

URFAN, da yessktayen yat tamyurt yenghuban, tizi lligh tmunanat tmgharin tama n ufarnu, ar ssenwant aghrum yemmimen iggi n urfan kmednin, ddaw imurig n tmdyazin n willi zrinin.

Ar takka tadla n izlan n umdyaz Oudmine yat taghamt i tmdyazt n wazzan amazigh, azzan yegan amud n imal, azzan lli rad yekkus tutlayt d tussna n Imazighen.

Drusen ukan imdyazen yettaran i wazzan d icirran n tmurt negh s tutlayt tamazight, teg tadla n umdyaz Oudmine tad yedulen i wuddur n tirra n wazzan d watig nes g usgmi d ulmmud n tarwa n imal.

Azêtta Amazigh i Tanamurt