Asbrrek > Tizrigin n Azetta

Illis n waman

Akwas 20 Cutanbir 2007 s umara reseauamazigh

Tazwart

Ar ttalsn imaziɣn ifḍan n umiyn allig inna ibn xaldun is d mra dd is ar ttaran imaziɣn aylli akkʷ ttinin n umiyn, tali ra d kturn icwariyn n warratn! imaziɣn gan zeg iɣerfan ilan taskla ibɣern, mqqar inɣuba kigan gis, acku ur urin ayda nesn n wawal d umarg d tminin, d umzruy!

imaziɣn gan i umiyn aṭas (kigan) n ismawn, ar asn ttinin: imandiwn (yan nes: imindi, zeg ndi: zik, gam), timinin (yat timint), tinfas (yat tanfust), timucuha (yat: tamacahut), tallast (zeg yuls: iqis umiy), tinqqisin (yat tanqqist, zeg iqis), tugt n ismawn ad gan tugga xf ubuɣlu n iger n wallas amaziɣ, yiri uzemz ad d gis ttagʷmn imaraten itraren n tasut ad, afad ad zdin tirra nesn d iẓuran n tussna nesn.

ultmatnɣ xadija abnrus tsti nettat ad n taggʷa s tsekla tamaḍlant zeg usksel n tmaziɣt, tsti yan mnnaw imandiwn n iɣerfan yaḍen, trartn s tmaziɣt, taratn s yat tutlayt (iles)

immimn ilan tisnt, ifawn i usakʷz n tarwa (aylli s ttakʷzn warraw), hatt id tiws ula nettat ad tṣku tabiwin n iles neɣ,

tsbedd agadir n tsekla neɣ, acku tamaziɣt ur bahra tra tugt n wawal, d imaziɣn n imi, ad tsɣaws g uzemz ad d tirsal idusn lli s ra d tbedd, d ifassen lli ra d sis ittara, ad tg iles atrar, imnawayn d wakud ad ittɣirn s tazzla n wawtil!

tanmirt i ultmatnɣ xadija, zḍarɣ ad iniɣ tga zeg tidrusi n tutmin izwarn g usays ad, tfka atig i iles nes g yat tizi innuKʷman, yiwi gis wasif afgan amaziɣ s umnid n uluzzu d ufruri n udem nes d tussna nes, nettat tggull ad tkkerz tiɣula n tmaziɣt inusan, acku id bab nes d tarwa nes, ujjantn i fad n tasutin d izeɣ n iseggʷasn d isasan n tatut d uzzemẓi, tra ad tfek i warraw n uskka amud d ifsan ma d ttkʷfisn g iḍerfan n ikttayn d ussan n uzemz amaziɣ!.

tanmirt tikklt yaḍn, ad yigut wanaw nem!

Muḥmmad usus